Mae pennod newydd wedi dechrau yn Ysgol 3-19 oed Brenin Harri VIII, Y Fenni, wrth i Gyngor Sir Fynwy dderbyn yr allweddi i adeilad newydd yr ysgol. 

Ar ôl pedair blynedd o gynllunio ac adeiladu, mae adeilad newydd yr ysgol ar fin croesawu disgyblion yn dilyn gwyliau’r Pasg. 

Mae hyn yn dynodi amser newydd cyffrous yn hanes yr ysgol ac addysg yn Sir Fynwy. Yr adeilad hwn fydd yr ysgol pob oed ddi-garbon net gyntaf yng Nghymru, wedi’i dylunio i ddefnyddio ynni isel wrth adeiladu a gweithredu, gyda’r nod o leihau costau cynnal a chadw yn y dyfodol yn sylweddol. 

Yn y seremoni, ymunwyd ag Arweinydd y Cyngor y Cynghorydd Mary Ann Brocklesby a Chadeirydd y Cyngor y Cynghorydd Su McConnel gan Bennaeth Ysgol 3-19 y Brenin Harri VIII, Jonathan Watson, Prif Weithredwr CSF Paul Matthews a’r Dirprwy Brif Weithredwr Peter Davies. 

Ar ôl torri’r rhuban, dywedodd Arweinydd y Cyngor, y Cynghorydd Brocklesby: “Rwyf wrth fy modd bod yr adeilad ysgol newydd bellach ar agor i ddysgu. Bydd yn esiampl i’r system addysg fodern yng Nghymru. Bydd y buddsoddiad hwn o fudd i bobl ifanc a chymuned y Fenni a’r cyffiniau. 

“Mae’r adeilad newydd yn ymgorffori ein hamcanion fel Cyngor, gan roi’r dechrau gorau posibl mewn bywyd i bobl ifanc drwy fuddsoddi yn eu dysgu a’u datblygiad, gan roi’r offer sydd eu hangen arnynt i ffynnu. 

“Diolch i Lywodraeth Cymru, sydd wedi ariannu’r prosiect ar y cyd, ac i bawb sydd wedi bod yn rhan o’r prosiect hwn. Rydym wedi gallu creu’r hwb dysgu gwych hwn yn y Fenni. 

Dywedodd y Cynghorydd Martyn Groucutt, Aelod Cabinet Cyngor Sir Fynwy dros Addysg: “Mae heddiw’n ddiwrnod gwych i’r Fenni a Sir Fynwy, wrth i ni dderbyn yr allweddi i’r adeilad newydd sbon hwn. Bydd yn gweithredu fel esiampl addysgol i’n cymuned leol ac i Gymru gyfan. Mae’r cyfleusterau newydd ymhlith y gorau y gallai unrhyw ysgol ddymuno amdano.” 

“Hoffwn achub ar y cyfle hwn i ganmol yr holl swyddogion a Morgan Sindall Construction am eu hymdrechion ar y cyd i gwblhau cam cyntaf y prosiect hwn. Mae’r gwaith rhyfeddol a gyflawnwyd hyd yma wedi creu gofod lle  

gall dysgu ffynnu.” 

Mae trosglwyddo’r allweddi yn garreg filltir arwyddocaol yn y prosiect blaenllaw hwn, gan ei fod yn arwydd o gwblhau cam un. Disgwylir i’r gwaith o adeiladu sy’n weddill ar gaeau chwarae a chanolfan ynni’r safle gael ei gwblhau erbyn mis Ebrill 2026. 

Bydd nodweddion allweddol safle newydd Brenin Harri VIII yn cynnwys: 

– Ysgol Ddi-Garbon Net gyntaf Sir Fynwy gyda mwy na 15,000m² o arwynebedd llawr defnyddiadwy 

– Dyluniad sy’n integreiddio natur ac elfennau naturiol yn bwrpasol i’r adeilad 

– Cyfleusterau chwaraeon eithriadol, gan gynnwys cae 3G, cae hoci ar lefel sirol, ac amrywiol Ardaloedd Chwaraeon Amlddefnydd 

– Dwy ysgol goedwig i hyrwyddo a hwyluso dysgu awyr agored 

– Cyfleusterau cymunedol 

Ysgol 3-19 oed Brenin Harri VIII yw ysgol pob oed gyntaf Sir Fynwy, o ganlyniad i uno Ysgol Uwchradd Brenin Harri VIII ac Ysgol Gynradd Deri View. 

Dywedodd Jonathan Watson, Pennaeth Ysgol Brenin Harri VIII 3-19, “Mae hwn yn ddiwrnod bendigedig i’n hysgol, un rydym i gyd wedi bod yn edrych ymlaen ato ac yn ei fwynhau. Pan fydd ein disgyblion yn dychwelyd ar ôl gwyliau’r Pasg, bydd eu llygaid yn goleuo wrth iddynt weld eu cyfleusterau newydd ysblennydd am y tro cyntaf, ni allaf aros.” 

“Credwn yn y gallu di-ben-draw i bawb gyflawni pethau gwych. Ein gweledigaeth yw i’n HOLL ddisgyblion, waeth beth fo’u cefndir, wneud cynnydd cyflym, cyflawni rhagoriaeth academaidd, a dod yn bobl wych sy’n arddel ein gwerthoedd cadarnhaol yn ddwfn yn eu calonnau. Rydym am i’n HOLL ddisgyblion, staff a theuluoedd deimlo ymlyniad cryf ac ymdeimlad dwfn o berthyn i’n hysgol. Bydd yr adeilad newydd anhygoel hwn yn sylfaen wych i wireddu’r weledigaeth hon.” 

Mae’r adeilad newydd wedi’i ariannu ar y cyd gan Lywodraeth Cymru a Chyngor Sir Fynwy drwy’r Rhaglen Cymunedau Cynaliadwy ar gyfer Dysgu – ymrwymiad Cymru’n Un sy’n cynrychioli cydweithrediad unigryw rhwng Llywodraeth Cymru a chynghorau lleol. Mae’n rhan o fenter buddsoddi cyfalaf strategol fawr, hirdymor i greu cenhedlaeth o Ysgolion Cynaliadwy yng Nghymru. 

I ddysgu mwy am Gymunedau Cynaliadwy ar gyfer Dysgu yn Sir Fynwy, ewch i www.monmouthshire.gov.uk/cy/cymunedau-dysgu-cynaliadwy/