Mae’r pwysau ar gyllid y sector cyhoeddus wedi’u hadrodd yn helaeth ar draws y DU. Mae Sir Fynwy ac eraill yn parhau i ymdrin ag amgylchiadau cyllideb heriol iawn. Mae adroddiad i’r Cabinet a gyhoeddwyd heddiw yn amlygu diffyg a ragwelir yn y gyllideb o £3.4 miliwn yn y flwyddyn ariannol gyfredol. Mae’r prif feysydd o bwysau parhaus yn ymwneud gyda’r galw am leoliadau gofal cymdeithasol drud a chymhleth iawn, anghenion dysgu ychwanegol plant, a chostau cludiant rhwng y cartref a’r ysgol yn cynyddu oherwydd marchnad drafnidiaeth heriol.

Mae’r Cyngor wedi amlinellu ystod o fesurau i fynd i’r afael â’r pwysau ar y gyllideb. Fodd bynnag, mae risgiau cyllidebol penodol yn parhau ar gyfer gweddill y flwyddyn ariannol sydd â’r potensial i gael effaith negyddol bellach ar sefyllfa’r gyllideb, gan gynnwys, yn fwyaf nodedig, ar lefel barhaus a chymhlethdod y galw a brofir.

Dywedodd yr Aelod Cabinet dros Adnoddau, y Cynghorydd Ben Callard: “Mae’r rhagolwg hwn yn hynod heriol. Mae’r pwysau ar wasanaethau cyhoeddus yn fwy nag erioed ac mae llywodraeth leol ar y rheng flaen o ran delio â’r pwysau hynny. Mae’r anghenion yr ydym yn eu cefnogi ar eu lefel uchaf erioed ac yn parhau i gynyddu.

“Rwy’n ymwybodol o’r her hyd yn oed yn fwy ar gyfer y flwyddyn ariannol nesaf gyda bwlch dangosol yn y gyllideb o £11.4 miliwn, a fydd yn gofyn am ateb strwythurol yn hytrach nag un ateb y mae’r Cabinet wedi ymrwymo i ymgysylltu’n bwrpasol â thrigolion arno”.

Dywedodd y Cynghorydd Mary Ann Brocklesby, Arweinydd y Cyngor: “Rwy’n ddiolchgar am y gwaith sydd wedi’i wneud eisoes i dynnu sylw at y mater y mae’n rhaid ei wynebu am weddill y flwyddyn ariannol. Mae darparu gwasanaethau lleol o ansawdd uchel sy’n atal pobl rhag mynd i argyfyngau yn parhau i fod yn  hanfodol ynghyd â chefnogi’r rheini sydd eisoes yn defnyddio gwasanaethau’r Cyngor yn ddigonol. O ystyried y cyd-destun cyllidebol, nid yw hon yn her hawdd, a rhaid i ni roi amser i ni ein hunain  i lunio ymateb meddylgar a chadarn i’r her yma”.