Mae Cyngor Sir Fynwy yn falch o gefnogi Wythnos Atal Cwympiadau – rhwng 23ain a’r 27ain Medi.

Mae atal cwympiadau yn hollbwysig, nid yn unig er mwyn osgoi anafiadau, ond hefyd er mwyn cynnal annibyniaeth, urddas ac ansawdd bywyd.

Mae cwympiadau yn bryder sylweddol, yn enwedig i oedolion hŷn neu bobl â symudedd cyfyngedig. Gallant arwain at anafiadau difrifol, gorfod mynd i’r ysbyty, colli annibyniaeth, a dirywiad mewn lles cyffredinol.

Fodd bynnag, mae modd atal llawer o gwympiadau gyda’r mesurau cywir yn eu lle.

Gall ein gwasanaeth Technoleg Gynorthwyol gynnig atebion arloesol i helpu pobl i fyw’n ddiogel ac yn gyfforddus yn eu cartrefi eu hunain.

Mae hyn yn cynnwys:
Lifeline a Synhwyrydd Cwympiadau
Mae’r Synhwyrydd Cwympo sy’n cael ei wisgo ar eich garddwrn yn synhwyrydd pwrpas deuol sydd â mesurydd cyflymu. Os yw’n canfod fod person wedi disgyn ar gyflymder a bod yna effaith sylweddol ac nad yw’n synhwyro’r unigolyn yn codi’n ôl o fewn cyfnod byr, bydd yn anfon rhybudd yn awtomatig i ganolfan monitro Lifeline. Mae wyneb yr uned yn cynnwys botwm brys y gellir ei wasgu mewn argyfyngau hefyd. Bydd pob gweithrediad o’r synhwyrydd i Lifeline yn rhybuddio’r gweithredwr, a fydd yn gwirio llesiant y person ac yn galw am ymatebwyr os oes angen.

Synwyryddion Gwely a Synwyryddion Cadair
Mae’r synwyryddion gwely a chadair yn cael eu gosod yn y dodrefn priodol a’u gosod i weithio yn ystod cyfnod a bennwyd ymlaen llaw. Gall y synwyryddion hyn rybuddio cyn gynted ag y byddant yn canfod y person yn codi o’r gwely neu’r gadair, neu ar ôl cyfnod penodol o absenoldeb yn amrywio o 2 i 90 munud. Mae hyn yn caniatáu amser ar gyfer gweithgareddau fel ymweld â’r ystafell ymolchi. Os na fydd y person yn dychwelyd o fewn yr amser penodedig, caiff rhybudd ei ddanfon i’r gweithredwr, a fydd wedyn yn gwirio llesiant y person ac yn galw am ymatebwyr os oes angen

Fideo Cloch y Drws
Gellir cysylltu Cloch y Drws Fideo â Alexa, gan ganiatáu ichi siarad â rhywun wrth y drws ffrynt trwy sgrin o gysur eich cadair freichiau. Mae hyn yn lleihau’r angen i godi i ateb y drws neu ruthro ato, a thrwy hynny leihau’r risg o gwympiadau posibl.

Echo Show neu Dot yn cysylltu â Bylbiau Golau Clyfar, Plygiau Clyfar
Gellir gosod bylbiau golau smart yn yr ystafell wely, y cyntedd a’r ystafell ymolchi i leihau’r risg o gwympo yn ystod y nos. Gellir gosod y bylbiau hyn i oleuo naill ai ar amserydd neu drwy orchmynion llais.

Bylbiau Golau Clyfar a Synhwyrydd  Symudiadau
Mae bylbiau golau sy’n cael eu cyfarwyddo gan lais unigolyn, o’u cysylltu â seinydd clyfar, yn cynnig annibyniaeth a sicrwydd. Gall y goleuadau hyn droi ymlaen yn awtomatig trwy integreiddio â synwyryddion symudiad sy’n canfod symudiad.

Olrhain GPS gyda Synhwyrydd Cwympiadau 
Mae’r ddyfais olrhain GPS yn helpu unigolion i gynnal eu hannibyniaeth tra allan yn y gymuned, gan roi sicrwydd i aelodau’r teulu. Mae’n cynnwys synhwyrydd codymau adeiledig sy’n hysbysu’r teulu os bydd cwymp yn digwydd.

Offer ‘Canary’
Pecynnau monitro cartref sy’n helpu aelodau’r teulu a gweithwyr proffesiynol i fonitro symudiadau o amgylch yr eiddo ddydd a nos gan ddefnyddio synwyryddion. Dros amser, mae’r data hwn yn eu galluogi i bennu’r pecyn gofal priodol.

Dywedodd y Cynghorydd Ian Chandler, Aelod Cabinet dros Ofal Cymdeithasol, Diogelu a Gwasanaethau Iechyd Hygyrch: “Gall Technoleg Gynorthwyol fel hyn wneud byd o wahaniaeth i sicrhau bod pobl yn Sir Fynwy yn gallu cadw eu hannibyniaeth.

“Mae’r gwasanaeth hwn yn helpu pobl i fyw’n gyfforddus ac yn ddiogel yn eu cartrefi eu hunain am gyfnod hirach.”

Cysylltwch â’r tîm Technoleg Gynorthwyol ar 01633 644466 neu assistivetech@monmouthshire.gov.ukneu ewch i https://www.monmouthshire.gov.uk/cy/gofal/technoleg-gynorthwyol/falls-prevention-assistive-technology/ am ragor o wybodaeth.