Yn dilyn penodi Cadeirydd y Cyngor, mae’r Cynghorydd Su McConnel wedi bod yn brysur yn ymweld â nifer o sefydliadau a digwyddiadau ar draws y Sir ac yn siarad â thrigolion.
Etholwyd y Cynghorydd Su McConnel yn Gadeirydd y Cyngor ar yr 16eg o Fai a bydd yn ei swydd am y Flwyddyn Ddinesig 2024/25. Mae’r Cynghorydd McConnell yn aelod o gyngor ward Croesonnen.
Dros yr wythnos ddiwethaf, mae’r Cynghorydd McConnel wedi ymweld ag ysgolion a chynhadledd y Gwasanaeth Ieuenctid i ddysgu mwy am bynciau sy’n bwysig i blant a phobl ifanc ledled Sir Fynwy a rhannu ei phrofiadau yn gweithio i’r gymuned.
Ar ddydd Mercher, 10fed o Orffennaf, mynychodd y Cynghorydd McConnel gynhadledd flynyddol Gwasanaeth Ieuenctid MonLife yn Neuadd y Sir, Brynbuga. Wrth siarad â dysgwyr o Ysgol 3-19 Brenin Harri VIII, Ysgol Gyfun Trefynwy ac Ysgol Cas-gwent, siaradodd y Cynghorydd McConnel a gwrandawodd ar y cyfranogwyr ar nifer o bynciau a gododd o’r bleidlais ‘Gwneud Eich Marc’. Yn ogystal â dysgu am y prif faterion sy’n bwysig i bobl ifanc, rhoddodd y Cynghorydd McConnel gipolwg o’i rôl fel Cadeirydd y Cyngor ac fel Aelod o’r Cyngor dros ei chymuned.
Dywedodd y Cynghorydd Su McConnel, Cadeirydd Cyngor Sir Fynwy: “Rhoddodd Cynhadledd Gwasanaeth Ieuenctid MonLife gyfle i mi ddysgu mwy am effaith yr argyfyngau Costau Byw, pwysigrwydd Iechyd Meddwl a thrafnidiaeth leol ar fywydau pobl ifanc. Fel Cyngor, mae gennym rôl i helpu a deall y pynciau sy’n bwysig i’n pobl ifanc, ac roedd yn wych gwrando ar y bobl ifanc yn ymgysylltu â swyddogion Cyngor Sir Fynwy a sefydliadau eraill a oedd yn bresennol.”
Yn dilyn y gynhadledd, ymwelodd y Cadeirydd ag Ysgol Brenin Harri VIII 3-19 i wylio eu cynhyrchiad o’r sioe West Side Story.
Cynhaliwyd yr ymweliad olaf ag Ysgol Gynradd Llandeilo Bertholau, a siaradodd y Cynghorydd McConnel â dysgwyr am ei rôl fel Cadeirydd Cyngor Sir Fynwy ac yn y gymuned. Roedd yr ymweliad yn rhan o brosiect yr ysgol ar bobl vwysig, sydd wedi gweld dysgwyr yn siarad â chyfreithiwr, Paralympiad, ac aelodau eraill o’r cyhoedd sy’n gweithio’n ddiflino i wella bywydau pobl yn Sir Fynwy.
![](https://www.monmouthshire.gov.uk/app/uploads/2024/07/Two-pupils-get-the-opportunity-to-wear-the-Chairs-chains-1.jpg)
Ychwanegodd y Cynghorydd Su McConnel: “Mae hi wedi bod yn wythnos wych yn ymweld â rhai o’n hysgolion lleol. Dangosodd fy ymweliad ag Ysgol Gynradd Llandeilo Bertholau y gall fod gennych ddiddordeb mewn gweithio yn y gymuned beth bynnag yw eich oedran. Hoffwn ddiolch i chi y dysgwyr am roi cyfle i mi siarad â nhw am fy rôl ac am y cwestiynau caled a ddilynodd.
Hoffwn ddiolch i Ysgol 3-19 Brenin Harri VIII am fy ngwahodd i fynychu eu cynhyrchiad West Side Story. Gwyddom oll fod rhai unigolion dawnus yn Sir Fynwy, ond cadarnhaodd hyn fod y celfyddydau perfformio yn Sir Fynwy a Chymru yn wirioneddol fyw. Llongyfarchiadau i’r dysgwyr a’r athrawon ar gynnal sioe wych.”
I ddarganfod mwy am rôl y Cynghorydd Su McConnel fel Cadeirydd y Cyngor neu i ddarganfod sut i wahodd y Cadeirydd i ddigwyddiad, ewch i: https://www.monmouthshire.gov.uk/cy/pobl-yn-y-cyngor/cadeirydd-cyngor-sir-fynwy/
Tags: Chair, Chair of the council, Monmouthshire, School