Ar y 10fed Rhoddwyd cymeradwyaeth ym mis Ebrill 2024 ar gyfer Gorchymyn Diogelu Mannau Cyhoeddus (GDMC) ar gyfer Rheolaethau Cŵn yn Sir Fynwy. Bydd y Gorchymyn newydd hwn yn berthnasol yn Sir Fynwy am gyfnod o 3 blynedd, o’r 1af Mehefin 2024 i’r 31ain Mai 2027.

Mae’r Gorchymyn yn cyflwyno 5 math o gyfyngiad. Mae’n drosedd mynd yn groes i unrhyw un o’r cyfyngiadau hyn:

1. BAEDDU GAN GŴN.

Mae hyn yn ei gwneud yn ofynnol i berson sy’n gyfrifol am gi lanhau os yw’r ci yn baeddu mewn unrhyw fan cyhoeddus yn y sir.

2. BAGIAU CŴN.

Mae hyn yn ei gwneud yn ofynnol i berson sy’n gyfrifol am gi, mewn unrhyw fan cyhoeddus yn y sir, gael modd priodol (e.e. bag baw ci) i godi unrhyw garthion gan y ci hwnnw a dangos bod ganddynt fag/bagiau os gofynnir iddynt wneud hynny gan swyddog awdurdodedig.

3. CI AR DENNYN DRWY GYFARWYDDYD.

Mae hyn yn ei gwneud yn ofynnol i berson sy’n gyfrifol am gi, mewn unrhyw fan cyhoeddus yn y sir, roi’r ci ar dennyn o ddim mwy na dau fetr o hyd, pan fydd swyddog awdurdodedig yn eu cyfarwyddo i wneud hynny, lle ystyrir nad yw’r ci dan reolaeth, neu’n achosi braw neu ofid, neu er mwyn atal niwsans.

4. ARDALOEDD CŴN AR DENNYN YN UNIG.

Mannau cyhoeddus penodol yw’r rhain, a nodwyd drwy ymgynghori, lle mae angen cadw ci ar dennyn o ddim mwy na dau fetr o hyd. Mae 20 wedi’u rhestru yn y GDMC ac fe’u nodir drwy gynlluniau lleoliad.

5. ARDALOEDD EITHRIO CŴN.

Mannau cyhoeddus penodol, lle mae cŵn wedi’u heithrio. Mae 180 wedi’u rhestru yn y GDMC ac fe’u nodir drwy gynlluniau lleoliad. Mae’r rhain wedi cael eu nodi drwy ymgynghori fel rhai sy’n gofyn am ddiogelwch pellach rhag baw cŵn oherwydd y prif ddefnydd o’r ardal. Mae’r rhain yn bennaf yn gaeau chwaraeon wedi’u marcio, ardaloedd chwarae i blant, tiroedd ysgolion a chanolfannau hamdden.

Beth fydd yn digwydd nesaf?

Bydd arwyddion rhybuddio’n cael eu gosod mewn lleoliadau priodol ar draws y sir, gan gynnwys pob un o’r ardaloedd newydd ar gyfer Eithrio ac Ar Dennyn Yn Unig.

Beth yw’r gosb am fethu â chydymffurfio â gorchymyn diogelu mannau cyhoeddus ar reoli cŵn?

Bydd Sir Fynwy yn cynnig hysbysiad cosb benodedig o £100 am droseddau sydd wedi’u cynnwys o fewn y rheolaethau gorchmynion diogelu mannau cyhoeddus. Bydd methu â thalu’r hysbysiad cosb benodedig yn arwain at yr awdurdod yn cymryd camau cyfreithiol, a allai arwain at uchafswm dirwy lefel 3 ar y raddfa safonol, sydd ar hyn o bryd yn £1,000.

Pwy alla i gysylltu â nhw am y Gorchymyn Diogelu Mannau Cyhoeddus (Rheoli Cŵn)?

Os oes gennych unrhyw ymholiadau ynglŷn â’r gorchymyn diogelu mannau cyhoeddus ar reoli cŵn, cysylltwch â’r isod:

Iechyd yr Amgylchedd, Cyngor Sir Fynwy, Neuadd y Sir, Y Rhadyr Brynbuga NP15 1GA Rhif Ffôn 01873 735420 environmentalhealth@monmouthshire.gov.uk