Mae Cyngor Sir Fynwy wedi cyhoeddi ei gynigion cyllidebol terfynol ar gyfer 2025-26, a fydd yn cael eu hadolygu yng nghyfarfod y Cabinet ar 5ed Mawrth.

Mae’r cynlluniau terfynol hyn yn ymgorffori adborth gan y cyhoedd a rhanddeiliaid a dderbyniwyd yn ystod y cyfnod ymgynghori ym mis Ionawr a mis Chwefror.

Mae’r Cabinet wedi ystyried adborth ynglŷn â’r newidiadau arfaethedig i oriau agor y pedwar hyb cymunedol ac wedi penderfynu peidio â bwrw ymlaen â’r newidiadau hynny ar hyn o bryd.

Mae’r gyllideb derfynol yn blaenoriaethu gwasanaethau cymdogaeth hanfodol sydd eu hangen ar gyfer cynnal ansawdd bywyd yn ein cymunedau a diogelu ein hamgylchedd ar gyfer cenedlaethau’r dyfodol. Fel rhan o’r ymrwymiad hwn, bydd cyllid ar gyfer Addysg yn cynyddu 11.3%, tra bydd cyllid ar gyfer Gofal Cymdeithasol ac Iechyd yn cynyddu 10.6%.

Yn ogystal, bydd dros £2 filiwn yn cael ei ddyrannu ar gyfer buddsoddiad cyfalaf mewn seilwaith hanfodol, gan ganolbwyntio ar wella priffyrdd. Mae hyn yn adeiladu ar fuddsoddiad y flwyddyn flaenorol o £1miliwn yn y meysydd hanfodol hyn.

Bydd 63% o’r gyllideb yn cael ei ariannu gan grant gan Lywodraeth Cymru, gyda’r arian sy’n weddill yn cael ei godi drwy’r dreth gyngor. Mae’r Cyngor yn cynnig cynnydd cyfartalog o 7.8% yn y dreth gyngor i gefnogi’r gwasanaethau hyn. Bydd cymorth ar gael o hyd i breswylwyr cymwys ynghylch eu biliau treth gyngor (www.monmouthshire.gov.uk/home/counciltaxandbenefits/).

Fel Cyngor, rydym yn ymrwymo’n llwyr i ymgynghori a gwrando ar yr hyn sydd bwysicaf i drigolion a rhanddeiliaid. Diolchwn i bawb a gymerodd yr amser i ymgysylltu â ni drwy ddigwyddiadau ymgysylltu â rhanddeiliaid, sesiynau digidol, a’r arolwg ymgynghori.

Dywedodd Arweinydd Cyngor Sir Fynwy, y Cynghorydd Mary Ann Brockelsby, “Rwyf am ddiolch i bawb a gymerodd ran yn ein hymarfer ymgynghori ac ymgysylltu ar y gyllideb. Rydym wedi gwrando ar bob darn o adborth amhrisiadwy a ddarparwyd. Mae’n hanfodol i fy Nghabinet fod anghenion trigolion a rhanddeiliaid yn ganolog i’n proses gosod cyllideb a’n bod yn cyflawni’r hyn sydd bwysicaf iddynt.”

“Rwy’n falch o’r gwaith a wnaed gan y Cabinet a swyddogion i gyrraedd y pwynt hwn, ac mae ein ffocws nawr yn troi at wella’r gwasanaethau lleol gwerthfawr sydd gennym yn Sir Fynwy.”

Ychwanegodd Aelod Cabinet Adnoddau Cyngor Sir Fynwy, y Cynghorydd Ben Callard, “Er gwaethaf yr heriau cyllidebol rydym wedi’u hwynebu, rwy’n falch ein bod wedi llwyddo i ddarparu cyllideb deg sy’n cynnal y Cyngor ar sylfaen ariannol sefydlog nawr ac yn y dyfodol. Mae cyfarfod â phreswylwyr a rhanddeiliaid i drafod ein cynigion cyllidebol wedi bod yn fraint. Gyda’n gilydd, rydym wedi sicrhau bod y gyllideb yn canolbwyntio ar yr hyn sydd bwysicaf iddyn nhw.”

Bydd y gyllideb derfynol yn cael ei hystyried i’w chymeradwyo gan y Cyngor llawn ar y 6ed Mawrth.