Ar ddydd Iau, 26ain Medi 2024, cyhoeddodd Cyngor Sir Fynwy lansiad Rhaglen Awtistiaeth mewn Ysgolion a Lleoliadau gyntaf Cymru.
Prif nod y rhaglen newydd hon yw gwella addysg i blant a phobl ifanc awtistig yn Sir Fynwy, gan gyfrannu at ddatblygu system addysg sydd yn wirioneddol gynhwysol yn y Sir a thu hwnt.
Bydd y fenter arloesol hon yn sicrhau bod pob dysgwr awtistig yn gallu cael mynediad at addysg sy’n diwallu eu hanghenion, gan eu galluogi i gymryd rhan mewn dysgu, elwa ohono a’i fwynhau.
Gweledigaeth y rhaglen yw darparu addysg gadarnhaol a chynhwysol i bob plentyn a pherson ifanc awtistig yn Sir Fynwy sy’n cefnogi eu hanghenion. Yn ogystal, ei nod yw creu profiad cadarnhaol a chydweithredol i rieni a gofalwyr pobl ifanc awtistig, gan gefnogi a gwella eu lles.
Wrth ddatblygu’r rhaglen arloesol hon, cydweithiodd Gwasanaeth Cynhwysiant Cyngor Sir Fynwy gyda’r Ymddiriedolaeth Addysgol Awtistiaeth, ymarferwyr addysgol, rhieni, gofalwyr a swyddogion o bob rhan o’r Cyngor.
Yn fwy pwysig na dim, chwaraeodd paneli o bobl ifanc awtistig o ysgolion uwchradd Sir Fynwy rôl hollbwysig wrth sicrhau bod eu profiad bywyd a’u harbenigedd wrth galon y rhaglen, gan wneud hyn yn ymdrech wirioneddol gynhwysol a chydweithredol.
Mae lansiad y rhaglen hon yn nodi carreg filltir arwyddocaol yn nhirwedd addysgol Sir Fynwy a Chymru, gyda’r potensial i drawsnewid y ffordd y caiff addysg ei darparu a’i phrofi gan blant a phobl ifanc awtistig.
Wrth lansio’r rhaglen ddydd Iau, dywedodd Aelod Cabinet Addysg Cyngor Sir Fynwy, y Cynghorydd Martyn Groucutt: “Mae’n bleser gen i gyhoeddi lansiad Rhaglen Awtistiaeth mewn Ysgolion a Lleoliadau gyntaf Cymru.
Bydd ein rhaglen newydd yn Sir Fynwy yn sicrhau bod pob dysgwr yn cael mynediad i addysg gynhwysol sy’n cefnogi eu hanghenion ac yn eu galluogi i lwyddo.
“Drwy gydol fy ngyrfa, rwyf wedi gweithio i wella addysg i bob dysgwr, a bydd y gwaith y mae ein tîm yma yng Nghyngor Sir Fynwy wedi’i wneud yn gosod safonau newydd ledled Cymru.”
I ddysgu mwy am y rhaglen, ewch i: https://www.monmouthshire.gov.uk/cy/awtistiaeth-mewn-ysgolion-a-lleoliadau-eraill/
