Mae Cyngor Sir Fynwy, ynghyd â Chynghorau Tref a Chymuned ar draws y sir, wedi cynnal diwrnod ymwybyddiaeth baw cŵn yn y Fenni a’r Goetre i atgyfnerthu’r negeseuon i berchnogion cŵn i lanhau ar ôl eu hanifeiliaid anwes.

Er bod y rhan fwyaf o berchnogion cŵn yn ymddwyn yn gyfrifol ac yn codi unrhyw faw gan eu hanifeiliaid anwes mewn man cyhoeddus, mae Cyngor Sir Fynwy yn parhau i dderbyn cwynion rheolaidd am faw cŵn, sy’n atal mwynhad beunyddiol mannau gwyrdd.

Gwelwyd adroddiad diweddar o hyn ar Gae Chwaraeon Lower Meadow, Y Fenni. Yn sgil yr holl faw ci ar y cae, ni allai myfyrwyr Brenin Harri VIII gymryd rhan mewn sesiwn rygbi diweddar. Mae’r gŵyn hon yn gyffredin ar draws y sir gan glybiau chwaraeon, sy’n cwyno’n aml am yr angen i gario bwced a rhaw i gaeau er mwyn clirio baw cŵn cyn y gall gemau neu hyfforddiant ddechrau.

Ar y diwrnod, ni ddaethpwyd o hyd i lawer o faw cŵn, ac eithrio ar lwybr rhwng Pen y Pound a Heol y Capel yn y Fenni, llwybr cerdded rheolaidd ar gyfer o leiaf un perchennog cŵn. Wrth i’r clociau newid dros yr wythnosau nesaf, mae’r Cyngor yn paratoi ar gyfer cynnydd yn nifer yr adroddiadau.

Roedd y diwrnod ymwybyddiaeth yn cyd-fynd â lansiad ymgynghoriad y Cyngor Sir ar ei Orchymyn Diogelu Mannau Cyhoeddus drafft, a fydd yn dod â’r ffordd y mae’r Cyngor Sir yn delio â baw cŵn yn gyson â siroedd eraill Cymru.

Mae’r GDMC drafft yn cynnig nifer o reolaethau i ddiogelu mwynhad pawb o fannau agored a holl dir cyhoeddus Sir Fynwy. Mae gan y GDMC drafft bum rheol arfaethedig ar gyfer rheoli cŵn:

• Darpariaeth sy’n ei gwneud yn ofynnol i’r person sydd â gofal ci lanhau ar ei ôl, os yw’n ymgarthu mewn man cyhoeddus. Bydd hyn yn berthnasol i bob man cyhoeddus yn Sir Fynwy.
• Darpariaeth sy’n ei gwneud yn ofynnol i’r sawl sy’n gyfrifol am gi mewn man cyhoeddus gael dull priodol (h.y. bag baw ci) i godi unrhyw faw a adawyd gan y ci hwnnw a dangos bod ganddo/ganddi fag(iau) os gofynnir iddo wneud hynny gan swyddog awdurdodedig.
• Darpariaeth sy’n ei gwneud yn ofynnol i’r person sydd â gofal ci, pan fo mewn man cyhoeddus, roi’r ci ar dennyn nad yw’n hwy na dau fetr o hyd pan gaiff ei gyfarwyddo i wneud hynny gan swyddog awdurdodedig, pan ystyrir bod y ci allan o reolaeth neu achosi braw neu drallod, neu i atal niwsans.
• Cyflwyno ardaloedd gwahardd cŵn, i’w hadnabod drwy ymgynghoriad fel meysydd risg uchel i iechyd y cyhoedd ac sydd angen eu hamddiffyn ymhellach rhag baw cŵn. Mae’r rhain fel arfer yn fannau chwarae i blant, caeau chwaraeon wedi’u marcio a thiroedd ysgol/canolfan hamdden yw’r rhain.
• Cyflwyno nifer o feysydd, drwy gyfrwng ymgynghori fesul achos, lle mae angen cadw ci ar dennyn heb fod yn fwy na dau fetr o hyd. Gall yr ardaloedd hyn gynnwys, er enghraifft, mynwentydd a pharciau sglefrio.

Ni fydd y rheolau hyn yn berthnasol i rai pobl anabl, cŵn cymorth neu gŵn gwaith fel cŵn chwilio ac achub tra byddant ar ddyletswydd.

Gwahoddir preswylwyr i gymryd rhan yn yr ymgynghoriad, sydd i’w gynnal tan 25ain Tachwedd, yma: https://www.monmouthshire.gov.uk/pspo-dog-controls/

Dywedodd Dirprwy Arweinydd Cyngor Sir Fynwy a’r Aelod Cabinet dros Gynllunio a Datblygu Economaidd, y Cyng. Paul Griffiths: “Rwy’n diolch i bob perchennog cŵn sy’n glanhau ar ôl eu hanifeiliaid anwes. Roedd yn galonogol clywed mai ychydig o faw a ddarganfuwyd yn ystod y diwrnod ymwybyddiaeth, ond wrth i’r clociau newid, rydym yn gwybod y bydd adroddiadau’n cynyddu. Mae’n gyfrifoldeb ar bawb (os yn gallu) i gadw ein mannau gwyrdd yn lân. Cofiwch wrth fynd â’ch ci am dro i fynd â bagiau gyda chi. Manteisiwch ar y cyfle i fynegi eich llais drwy gymryd rhan yn yr ymgynghoriad presennol. Mae eich barn yn bwysig i ni.”