Dros y pedair blynedd diwethaf, mae Cyngor Sir Fynwy wedi bod yn gweithio’n agos gyda grŵp lleol gweithgar ac ymroddedig iawn, Friends of Dell Park Chepstow, i ddatblygu cynllun i uwchraddio’r ardal chwarae i blant ym Mhant y Castell, wrth ymyl maes parcio Stryd y Banc.

Pan gafodd yr ardal chwarae ei harolygu gan asesydd annibynnol yn ôl yn 2019, cyflawnodd y parc sgôr isel iawn o ran gwerth chwarae.  Bydd y cynigion ar gyfer y parc newydd, a drafodwyd yng nghyfarfod cabinet llawn Cyngor Sir Fynwy ddydd Mercher 2^il Mawrth, pan fyddant yn cael eu gweithredu, yn cynnig lefel llawer uwch o werth chwarae i blant lleol a bydd yn gwella amgylchedd y man agored ehangach. 

Pant y Castell yw’r ardal fwyaf o fannau agored cyhoeddus yng Nghas-gwent ac mae’n darparu cyswllt di-draffig pwysig rhwng canol y dref a’r castell. Mae Taith Gerdded Dyffryn Gwy hefyd yn rhedeg drwy Bant y Castell, felly bydd pobl sy’n ymweld â’r dref i gerdded y llwybr pwysig hwn hefyd yn elwa o’r gwelliannau a gynigir. Bydd lleoliad y parc yn cael ei newid ychydig i ddarparu lleoliad tirwedd mwy dymunol a gwell golygfeydd o wal hanesyddol y dref.

Y Cynghorydd Meddai Lisa Dymock, yr aelod cabinet dros Les Cymdeithasol: “Gwneir cais i Gronfa Gymunedol y Loteri Genedlaethol am grant tuag at y prosiect, gyda chyllid arall yn cael ei ddarparu gan Gyngor Sir Fynwy a thrwy godi arian lleol.  Os bydd y cais yn llwyddiannus, byddem yn gobeithio dechrau gwneud y gwaith yn ddiweddarach eleni.  Bydd y prosiect yn defnyddio offer chwarae a weithgynhyrchwyd yn bennaf o bren caled mwy cynaliadwy fel robinia, sy’n cyd-fynd yn llwyr ag agenda’r cyngor ar y newid yn yr hinsawdd a gyda’r lleoliad pwysig a hanesyddol hwn.”