Bydd y gwaith o adnewyddu Canolfan Hamdden y Fenni yn dechrau gyda lluniau newydd yn cael eu datgelu o’r hyn y gall cwsmeriaid ei ddisgwyl ar ôl i’r gwaith gael ei gwblhau.
Bydd Cyngor Sir Fynwy yn bwrw ymlaen ag adnewyddu Canolfan Hamdden y Fenni rhwng dydd Mawrth 31ain Awst tan fis Ionawr 2022. Bydd y cyfleusterau newydd yn gweld yr ystafell ffitrwydd yn cael ei hymestyn, gyda stiwdio ymarfer corff grŵp bwrpasol, yn ogystal â mynediad i stiwdio sbin i feicwyr brwd. Bydd y gwaith adnewyddu hefyd yn cynnwys cyfleusterau newid newydd a chyfleuster gwerthu i gwsmeriaid gael diodydd poeth.
Mae’r darparwr hamdden, MonLife wedi ymrwymo i fuddsoddi mewn prosiectau a fydd o fudd i iechyd a lles cymuned y sir. Bydd y ganolfan hamdden newydd yn addas i’r rhai sydd ag anableddau, gan gydymffurfio â Deddf Cydraddoldeb 2010. Bydd yr ail-ddatblygu yn cynnwys offer campfa hygyrch, stiwdios agored gyda mynediad hawdd, cyfleusterau newid hygyrch, a drysau awtomatig. Bydd rhan o’r gwaith adnewyddu yn cynnwys hyb lles ar y llawr cyntaf i greu cyfleusterau hamdden modern i’r gymuned leol, gan helpu i gynyddu cyfranogiad mewn gweithgaredd corfforol rheolaidd.
Mae cwsmeriaid presennol yn cael gwybod y bydd gan wasanaethau, cyfleusterau a dosbarthiadau amserlen ddiwygiedig pan fydd y gwaith yn cael ei wneud. Bydd yr ystafell ffitrwydd yn cau’n rhannol o 8:30am ddydd Gwener 27ain Awst tra bod offer yn cael ei adleoli i’r cyfleuster dros dro. Caiff cynnig ystafell ffitrwydd dros dro ei ddarparu a fydd wedi’i leoli yng nghampfa’r ysgol (gyferbyn â’r brif dderbynfa). Trwy gydol yr adeiladu bydd nifer llai o leoedd parcio ceir. O ganlyniad, mae cerdded a beicio yn ôl ac ymlaen i’r safle yn cael ei annog yn fawr lle bo hynny’n bosibl. Bydd angen i bob defnyddiwr achlysurol gael tocyn o’r brif dderbynfa cyn mynd i mewn i gampfa’r ysgol er mwyn cael mynediad i’r ystafell/dosbarthiadau ffitrwydd. Bydd cawodydd a chyfleusterau newid ar gael yn y brif ganolfan o ddydd Llun i ddydd Gwener cyn 8am ac ar ôl 5pm. Ar benwythnosau byddant ar gael rhwng 8:15am a 6pm.
Mae cwsmeriaid hefyd yn cael eu hatgoffa o’r gweithdrefnau COVID-19 presennol sydd ar waith. Mae gorchuddion wyneb a diheintydd dwylo yn ofyniad wrth fynd i mewn ac allan o’r adeilad. Bydd systemau unffordd hefyd ar waith i ddefnyddwyr eu dilyn lle bo hynny’n bosibl. Bydd amserlen dosbarth ffitrwydd ddiwygiedig rhwng mis Medi a mis Ionawr, sydd i’w weld drwy glicio yma: https://www.monlife.co.uk/cy/abergavenny-leisure-centre/
Dywedodd y Cynghorydd Lisa Dymock, Aelod Cabinet Cyngor Sir Fynwy ar gyfer Llesiant Cymunedol a Chyfiawnder Cymdeithasol: “Mae’n wych gweld y prosiect cyffrous hwn yn cymryd cam ymhellach. Rydym wedi ymrwymo i fuddsoddi mewn cyfleusterau hamdden a’u datblygu ar draws ein sir, sy’n cael effaith mor gadarnhaol nid yn unig i’n trigolion presennol, ond i genedlaethau’r dyfodol hefyd. Diolch i bawb ym MonLife am eich gwaith caled parhaus yng Nghanolfan Hamdden y Fenni.”
Os oes gan gwsmeriaid unrhyw gwestiynau pellach, dylent gysylltu â MonLifeProjects@monmouthshire.gov.uk Gellir dod o hyd i wybodaeth ddefnyddiol am adnewyddu canolfan hamdden y Fenni a chwestiynau cyffredin YMA.